魔力碗真係有魔力?! Three Little Meow *非專業*測試報告

日本魔力碗(台灣又稱多喝水碗) 都hit左一段時間, 不少客人都問過我地有冇得賣, 於是我地決定從日本買一隻返黎自己試下先! (其實係3個老闆試, 貓奴邊配用2百幾元的碗…..淚)

 

先來魔力碗官方介紹~

「此系列產品以2億8000萬年前出土的天然礦物(不含放射性元素)和生醫陶瓷(Bioceramics)混合燒成的人工機能石為素材，歷經1100度的高溫，燒製成這個系列的容器。對照保存在一般陶瓷容器的自來水和保存在Health Water Series容器中的自來水，證實保存在Health Water Series容器中的自來水的味道會隨著時間而產生變化，而使兩邊的水的味道產生落差。因為味覺感官和喜好一定會有不同，我們沒法百分百保證這個味道的轉換是正面的，但是在味道的實驗中，一般來說不受歡迎的味道屬性（刺激性等）證實被減低了。而一般來說受歡迎的味道屬性（深度，甜味等）被提高了。」

大概意思就係話, 水放在呢個碗內一段時間後, 可以去除一些不好的氣味, 提升水原有的甜味…所以水都要放在呢個碗裡一陣先開始有效, 如果你的主子見你一放低個碗就衝埋去飲, 咁應該係佢鐘意*新鮮乾淨*水多過個碗啊! (逃) 其實睇到呢度, 大家可能都會諗到, 有好多方法做到改善味道…

3位老闆家中原有飲水設施: 1部流動水機, 1碗水, 2杯水(人用杯, 作為貓奴的你慬的.) 放在家中不同位置 (大包圍做法, 總有一兜對胃口~)

背景~ 三位老闆的飲水情況:
大老闆自細都飲得比較少水, 未用流動水機之前, 佢最喜歡去飲水喉水. 用左水機有飲多左, 但都係鐘意水喉水多D, 後來估佢應該係唔鐘意煲過既水有陣味, 最後轉埋一部有殺菌功能+除氯氣的濾水器, 直接俾過濾左的水佢飲就解決了飲水問題
二老闆及三老闆: 飲得都算多水, 特別係三老闆, 但只去水機飲, 換完水佢一定飲頭啖水, 一坐低可以飲半分鐘. 二老闆就水機, 水兜都會飲.
由於3位老闆目前都冇嚴重唔飲水問題, 今次測試目的係睇下佢地會唔會飲多左或者鐘意飲魔力碗既水多過水機/普通碗

測試時間: 2星期
由於日頭貓奴多數不在家, 所以觀察時間大多在早上出門前及晚上, 每日約有8-9小時

測試情況:
第一日, 個碗放在原有水兜位置, 放左三日, 三個老闆都冇幫襯…
於是我地將個碗放在貓餐桌旁邊 (呢個位原本係冇放任何水兜), 第二日終於見到三老闆第一次幫襯, 都飲左好耐下. 不過之後就再冇見到有貓飲lu~ (但目測水係有少到的)
第二個星期, 我地決定再換位, 今次將佢放在流動水機附近. 過左兩日, 三老闆走埋去最後選擇了水機. 另一日見到圖中呢一幕: 二老闆去魔力碗度飲(!!), 大老闆就繼續幫襯流動水機… (由頭到尾都冇見過大老闆幫襯…)
(註: 用魔力碗要盡量不換水, 因為個碗需要時間去提升水的味道, 所以我地都係見到碗內真係好多毛先換, 同埋每次換完水要等一段時間先知個碗有冇效. )

總結: 如果你的主子係因為水的味道而唔飲, 呢個魔力碗係一個機會令你主子飲多D. (正如官方介紹所講, 呢個碗係透過改變水的味道去吸引貓貓飲多D. 味道呢D 野係好主觀的啊…) 魔力碗市面售價約港幣二百多(M size), 為左主子健康, 如負擔得到一試無妨, 因為他日不幸主子有腎病, 醫療費用更高!! 但更重要既係貓奴要有*恆心*, *肯去試*唔同方法, 搵出主子唔飲水的原因 (味道? 擺放位置? 流動/靜止? 唔清潔?), 不是買個碗就一勞永逸啊~
(待續, 下篇將會講講有咩其他方法吸引主子飲水)